Skólaslit á Litla-Hrauni
Skólaslit Fjölbrautaskóla Suðurlands voru í dag á Litla-Hrauni og af því tilefni var morgunverður snæddur úti í góða veðrinu.
Innritaðir voru 39 vistmenn á vorönn Fjölbrautaskóla Suðurlands. Einn hóf þó ekki nám þar sem ekki var boðið upp á það fag sem hann hafði óskað eftir. Tveir hættu eftir viku og 8 skiluðu sér ekki í próf. Tuttugu og átta nemendur luku prófum í samtals 192 einingum. Sá sem náði besta árangrinum skilaði 28 einingum á vorönn og hann er jafnframt skráður í 20 eininga nám í fjarnámi í sumar. Sex einstaklingar hafa hug á að stunda nám í sumar.
Ljóst er að aldrei áður hafa eins margir vistmenn á Litla-Hrauni lokið skilgreindum framhaldsskólaeiningum við FSu á einni önn og nú á vorönn 2009. Auk þess voru 6 nemendur í fjarnámi við aðra skóla.
Auk námsráðgjafa í hálfu starfi og kennslustjóra í hlutastarfi komu 6 kennarar frá FSu einu sinni til tvisvar í viku og kenndu samtals 13 kennslugreinar, sumar upp á marga áfanga.
Frá áramótum hafa einnig verið haldin námskeið t.d. í skapandi skrifum og silfursmíði, sem ráðgert er að halda áfram með í sumar. Þá hafa verið haldin námskeið í íhugun og jóga.