Reglur um fangaflutninga og þau sjónarmið sem að baki þeim liggja
Í kjölfar síðasta stroks fanga frá flutningsmönnum hafa reglur um flutninga fanga verið endurskoðaðar. Í því sambandi vaknaði að sjálfsögðu sú spurning hvort ávallt ætti að flytja fanga í handjárnum eins og tíðkast hjá lögreglu en sú krafa hefur ekki verið gerð varðandi flutning afplánunarfanga. Að athuguðu máli varð niðurstaðan sú að áfram skyldi unnið á sömu braut, það er að byggja á mati á aðstæðum hverju sinni en þó skal flytja fanga í handjárnum í vafatilvikum og gæsluvarðhaldsfangar eru almennt fluttir í handjárnum. Fyrir þessu eru eftirfarandi rök.
Fangaflutningar eru af ýmsum toga og eiga í raun lítið skylt við flutning lögreglu á grunuðum mönnum. Þetta sést best þegar menn velta fyrir sér þeim aðstæðum sem upp kunna að koma í hinu daglega lífi í fangelsunum. Á t.d. að færa fanga sem stundar vinnu eða er í skóla utan fangelsis í handjárnum frá fangelsinu á viðkomandi stað og til baka? Á að flytja fanga í handjárnum í jarðarför náins skyldmennis eða á biðstofu læknis? Sömu fangar geta verið í dagsleyfum mánaðarlega. Niðurstaðan varð sú að byggja verður á faglegu mati flutningsmanna, varðstjóra og eftir atvikum forstöðumanns fangelsis hverju sinni þegar fyrirkomulag fangaflutnings er ákveðið. Sjá reglur um fangaflutninga.