Dómsmálaráðherra, Björn Bjarnason, skipar nefnd vegna framtíðarskipulags Fangelsisins Litla-Hrauni
Með bréfi forstjóra Fangelsismálastofnunar, dags. 25. september 2006, til dómsmálaráðherra, var lagt til að skipuð yrði nefnd til að vinna að mótun stefnu varðandi framtíðarrekstur Fangelsisins Litla-Hrauni. Sjá nánar. Að móttekinni þessari tillögu ákvað dómsmálaráðherra að skipa fimm manna nefnd sem hefði það hlutverk að móta slíka stefnu. Meðal þeirra atriða sem nefndinni er sérstaklega ætlað að skoða eru öryggismál fangelsisins í heild, öryggi og starfsaðstaða kvenfanga, vinna fanga, hlutverk fangavarða miðað við að teknar yrðu upp þrískiptar vaktir og leiðir til að sporna gegn fíkniefnaneyslu í fangelsinu.
Í nefndinni eiga sæti:
Margrét Frímannsdóttir, alþingismaður, sem jafnframt er formaður nefndarinnar
Anna Sigríður Arnardóttir, lögfræðingur, dóms- og kirkjumálaráðuneyti
Kristján Stefánsson, forstöðumaður Fangelsisins Litla-Hrauni
Margrét Sæmundsdóttir, deildarsérfræðingur, Fangelsismálastofnun
Sigurjón Birgisson, formaður Fangavarðafélags Íslands