Fangelsið Akureyri

Fangelsið Akureyri hefur verið starfrækt í húsnæði lögreglunnar á Akureyri frá árinu 1978. Hinn 7. ágúst 2008 var endurbyggt fangelsi formlega tekið í notkun og er nú aðstaða fyrir 10 fanga og er hún öll til fyrirmyndar. Áður var unnt að vista 8 fanga, í undantekningartilvikum 9.

Í fangelsinu er rúmgóð setustofa, sem jafnframt er nýtt sem matstofa og sjónvarpsherbergi. Um 100^m2 lokaður garður er við fangelsið þar sem fangar hafa aðstöðu til boltaleikja og útiveru. Góð aðstaða er til vinnu og náms á staðnum. Fangar sem vistaðir eru í fangelsinu þurfa að vera tilbúnir til að vinna bug á vímuefnavanda sínum og taka virkan þátt í endurhæfingaráætlun, sé fær um að afplána við lágmarksöryggisgæslu og stunda vinnu eða nám meðan á afplánun þar stendur. Sjá nánar bækling um Fangelsið Akureyri.

Starfsmenn: Varðstjóri ber daglega ábyrgð á fangelsinu í samráði við forstöðumann fangelsisins sem er staðsettur á höfuðborgarsvæðinu og aðstoðarvarðstjóri vinnur á dagvöktum á móti varðstjóra. Fangaverðir eru fjórir. Þar sem fangelsið er svo nátengt lögreglustöðinni og í húsnæði hennar er mikil samvinna milli starfsmanna þessara tveggja stofnana.

Vinna fanga: Vinnuaðstaða er í fangelsinu, einn fangi hefur umsjón með þrifum ganga og salerna í fangahluta. Önnur tilfallandi störf tengjast viðhaldsverkefnum innandyra og lóðarvinnu.

Samkvæmt reglugerð um fullnustu refsinga nr. 961/2005 skal Fangelsismálastofnun setja gjaldskrá um þóknun fyrir vinnu og nám, upphæð dagpeninga fanga og greiðslufyrirkomulag. Þóknun fyrir hverja klukkustund fer eftir eðli starfs. Fangi í námi skal fá þóknun fyrir hverja kennslustund, en þó ekki fyrir fleiri kennslustundir en fimm á dag. Þóknun og dagpeningar skulu greiddir eftir á og að lágmarki á tveggja vikna fresti. Gjaldskráin skal endurskoðuð árlega.  

Símatímar: Kortasími er fyrir fanga í Fangelsinu Fangelsinu Akureyri og hafa fangar nokkuð frjálsan aðgang að honum. Þá getur fangi notað síma til að ná í opinbera aðila í samræmi við 49. gr. laga um fullnustu refsinga nr. 15/2016.

Heimsóknir:  Samkvæmt 45. gr. laga um fullnustu refsinga nr. 15/2016 getur fangi fengið heimsóknir frá fjölskyldu og vinum ef aðstæður í fangelsi leyfa og slíkt telst gagnlegt sem þáttur í refsifullnustu hans. Fangi getur fengið heimsóknir frá fjölskyldu eigi sjaldnar en vikulega en heimsóknir frá vinum skulu ekki vera fleiri en tvær í mánuði nema í sérstökum tilvikum. Heimsókn fer fram í sérstöku heimsóknarherbergi.  

Heimsóknir nánustu vandamanna eru leyfðar einu sinni í viku í 2 klst. í senn.  Fjöldi gesta hverju sinni er að hámarki 3.  Fangi getur sótt um heimsóknarleyfi fyrir aðra aðila en nánustu vandamenn á þar til gerðu eyðublaði í fangelsinu og eru þær háðar samþykki yfirmanna fangelsisins.  Fangi getur auk þess sótt um fleiri heimsóknir í viku á sama hátt. 

Útivera og tómstundir: Samkvæmt 52. gr. laga um fullnustu refsinga nr. 15/2016 á fangi rétt á útiveru og að iðka tómstundastörf, líkamsrækt og íþróttir í frítíma eftir því sem aðstæður í fangelsi leyfa í að minnsta kosti eina og hálfa klukkustund á dag nema það sé ósamrýmanlegt góðri reglu og öryggi í fangelsi. Lokaður útivistargarður er við fangelsið og fá fangar að fara í útivist þar eins og aðstæður leyfa.